Citibank экспертларига кўра, олтиннинг узоқ давом этган ўсиш даври якун топмоқда ва келажакда унинг нархи бир унция учун $3 000 белгисидан пастга тушиши эҳтимоли бор. Банкнинг фикрича, ҳозирча геосиёсий хатарлар ва АҚШдаги бюджет билан боғлиқ муаммолар туфайли нархлар юқори даражада туриб туриши мумкин.

2026 йилдан бошлаб эса, талабнинг камайиши ва глобал иқтисодий барқарорлашув фонида, олтиннинг қиймати пасайишга юз тутиши мумкин. Citibank'нинг яқиндаги таҳлилларига кўра, инвестицион қизиқиш сусайиши натижасида 2025 йил охири ёки 2026 йил бошларида унция нархи $3,000 дан тушиб кетиши мумкин.

Янги прогнозларга кўра, банк қисқа муддат (0–3 ой) учун нархни $3,500 ўрнида $3,300 деб баҳоламоқда. Ўрта муддат (6–12 ой) прогноз эса $3,000 ўрнида $2,800 атрофида. Шу билан бирга, 2025 йилнинг учинчи чорагигача олтин нархи $3,100–$3,500 диапазонида бўлиши тахмин қилинмоқда — буга геосиёсий ноаниқликлар, АҚШдаги бож сиёсати ва бюджет тангликлари таъсир кўрсатиши мумкин.

Citibank ўз ҳисоботида таъкидладики, 2025 йил охири ва 2026 йилда Трампнинг оммалашуви ва АҚШ иқтисодиётига бўлган ишончнинг ортгани фонида, олтинга бўлган инвестицион талаб камайиши мумкин.

Бошқа сценарийларга кўра:

Асосий сценарий (60% эҳтимол): нарх қисқа муддатда $3,000 дан юқори туриб, кейин пасайиши мумкин.

Оптимистик сценарий (20%): тарифлар ёки сиёсий нотинчликлар ортиши билан нарх яна ўсиши мумкин.

Пессимистик сценарий (20%): тарифлар муаммоси тез ҳал бўлса, бозор барқарорлашади ва нарх сезиларли даражада тушиб кетиши мумкин.

Шу билан бирга, Citibank кумуш нархлари бўйича нисбатан ижобий прогнозни тақдим этди. Унга кўра, кумуш унцияси 6–12 ой ичида $40 гача кўтарилиши мумкин. Айни пайтда нарх $37 бўлиб, келажакдаги ўсишга кумуш захираларининг чекланганлиги ва талабнинг юқорилиги сабаб бўлади.

Банкга кўра, агар АҚШ–Хитой савдо келишмовчилиги тез ҳал этилса ва Федерал резерв сиёсати янада қаттиқлашса, кумуш нархи $46/унциягача етиши мумкин.

Добавить комментарий